My Maramag Trip

Mga alas-onse dun sang kagab-ihon sang Oktubre 27, 2010 sang maabot koang Maramag. Samtang sa dalan pa lang mabatyagan mo gid kung ano kabugnaw ang Bukidnon sa oras sang kagab-ihon.

Maswerte ako sa pag-atiman sa akon sang mga pamilya Puerto sa Maramag. Sa sina man nga adlaw birthday ni Bryan, isa sa mga estudyante ko sa Kong Hua School. Nabusog gid ako sang gin preparar nila nga pagkaon pareho sang adobo nga "native na manok", sinabawan kag binutangan sang ugbos ka katumbal kag kapayas. Perti gid ka namit.

Daw mahidlaw man ako sa probinsya namon sa Cotabato kag sa Iloilo. Ang mga tawo simple ang pagpangabuhi. Matandos kag mayad gid sing mga batasan. Pagpanguma man ang kinabuhian sang mga tawo sa Maramag. Matawhay kag layo sa gamo nga lugar. Bisan pa sa kabud kun kis-a, ang mga tawo didto makita mo nga nagayuhum kag maabi-abihon gihapon.

Sa pagkahapon sang Oktubre 28, nakapamasyar kami sa Deer Farm ni Sen. Miguel Zubiri. Nalingaw man ako didto sang mga gakalain-lain nga mga kasapatan nga gina atipan nanda sa resort. Malas lang abi kay wala gid kami dala nga camera.

Sa pagpauli nag-agi kami sa uma day Maam Neneng. Lingaw man ang mga tawo didto. Birthday ni Nong Ricky pagkadto namon. Malipay gid ikaw mag-isip kay sa pihak sang kabudlay sa sitwasyon kag biskan gamay lang nga handa, si Nong Ricky indi gid malipat pang-imbitar sang iya mga tupad balay para mag-iyapon.

Si Maam Neneng, mayad man tawo kay makit-an mo gid ang pag-atipan niya indi lang sa iya uma kag para makakuha kwarta sa kinapuyan sang mga trabahante kundi makita mo man ang sinseridad niya sa pag aligrar sang mga panlawas kag pinansiyal nga panginahanglanon sang iya mga tinawo. Kung isipon mo gani, daw indi layo nga pamilya ang iya pagtratar. Amo gid ina siguro, nga kung maayo ka sa imo isig katawo, ang grasya nga imo ginahatag sa ila ibalik sang Dios sa pila ka pilo.

Ang akon pagbisita didto, isa sa mga indi ko gid malimtan nga biyahe. Kada oras nag kaon kami. Ikaw na lang magsurrender. Kun magtinir pa siguro didto sang mga isa ka semana sigurado gid madugangan sa tambok ko kag ya bilbil. Madamo gid nga salamat!

mga alas siyete sa gab-i naglakat ako pakadto sa Malaybalay para magkita isang iban ko pa nga mga barkada.

Sa liwat madamo gid nga salamat!

kimoy

My President NOYNOY

Matapos ang pila ka tuig nga pagpungko ni PGMA as President sang Pilipinas karon nga adlaw mahuman na gid ang iya corrpt nga pang-gobyerno.

Karon nga adlaw, samtang nagapanaog si Gloria sa Malacanang, amo man ang pagsaka ni Noynoy bilang ika-15 nga President sang Pilipinas. Si Noynoy nagdaog matapos makuha ang may halos 15 milyones nga boto katung nagligad nga pinakauna nga Automated Election (Mayo 10, 2010). Pipila man ka kontrobersiya ang naglagpasan ni Noynoy kag sang iya grupo nga Liberal Party.

Duha ka semana bag-o ang pormal ang pagpungko ni Noynoy, mataas-taas man nga debate ang natabo sa sulod sang Congreso samtang ginacanvass ang mga tally sheets kag iban pa nga mga electoral protest particular na sa mga napeldi nga mga kandidato.

Si Noynoy ang ikaapat nga batan-on nga President kag ang pinakauna nga Single President sang Pilipinas. Hangtud karon wala pa kablo ang mga tawo kung kinsa gid ang First lady ni Noynoy; ang mga utod niya nga bayi o ang nobya nga si Shallani?

Well, medyo damo gid nga problema ang atubangon ni Noynoy halin sa administrasyon ni PGMA. Idugang mo pa ang halos 15 bilyones nga deficit sang nagligad nga administrasyon. Meaning amo na ang kantidad nga dugang utang sang Pilipiunas... sin-o ang magbayad? KITA!

Si Noynoy indi man Superhero nga mahimo insigida ang mga pagbag-o sa Pilipinas. Magtinabangay kita para sa kaayuhan sang aton nga nasyon. Indi naton tanan isalig kay Noynoy. Kita man dapat maghimo sang angay naton buhaton. magsunod sa mga simple nga patakaran sang aton nasyon halin sa paghaboy sang aton mga basura sa insakto nga lugar hangtud sa pagbayad sang aton buwis.

Magbantay kag mangin aktibo nga Pilipino!

Kimoy

Eroplano nga Papel

Isa ka hapon sa eskwelahan sa Kong Hua nagapractice mga estudyante ko para sa ila cheerdance. Ang iban tama gid ka urogtasan. Waay ga paramati sa mga ginahambal ka trainor. Simple nga instruction indi ka sunod.

Sa pihak sang pader may mga panimalay. Ang iban mga bata gatamwa-tamwa sa pader makalantaw kung ano ginahimo namon sa sunlod. Samtang ginalantaw ko lang sila nakahambal man ako nga: "Amo gid siguro ning kinabuhi. Ang iban sa sulod na sang eskwelahan pero wala gapakita sang pagpaningkamot sa pagtuon. Samtang ang iban kabataan, kinahanglan pa manaka ka pader makalantaw lang sang eskwelahan nga ginatawag".

Ginpalapitan ko ang mag bata kag ginistorya. nalingaw man ako sang mga sabat sang mga bata sa akon. Ang isa ka bata gahampang ka iya nga eroplano nga papel. Mataas ang mga bata nga ako naistorya pero ang sitwasyon nagahambal sang kalisud sang kinabuhi nga bisan gani pag paeskwela sa elementary indi na kaya sang ila mga ginikanan.

Amo nga dapat naton tandaan, nga ang mga tawo may kadaiya nga krus nga paga-antuson samtang may iban nga ginausikan lamang ang mga tion kag grasya nga ginhatag sa ila sang Dios. Gabay nga ining mga kabataan pagagiyahan sang Dios sa ila pagpanglakatan kag sa pag-atubang sa mga kalisud nga ila makasulapo sa mga masunod nga inoras, inadlaw, binulan, kag tinuig sang ila kinabuhi.

kimrowell84